طلحہ آپ نے یہ تو لکھا ہی نہیں کہ آپ کی لکھائی اردو کی خراب ہے یا انگریزی کی۔ یہ بھی ہوسکتا ہے کہ آپ نے دونوں زبانوں کی لکھائی پر توجہ نہ دی ہو اور آپ کو دونوں مضامین کے پیریڈ میں اپنے استاد یا استانی سے خراب لکھائی پر ڈانٹ پڑی ہو۔ آپ بازار سے خوشخطی کی ورک بک خرید کر اس پر مشق شروع کریں، مزید یہ کہ جس طرح اکثر کوئی جملہ سو بار لکھنے کی سزا دی جاتی ہے تو اس سزا کو خود اختیار کرکے خوب لکھنے کی کوشش کریں، اردو بھی پہلے چار لائنوں والی کاپی پر لکھیں اور پھر ایک لائن والے صفحات پر لائن کے عین اوپر الفاظ کو لکھنا سیکھیں۔ اس کے لیے آپ استاد سے اچھی لکھائی کے نمونے بھی حاصل کرسکتے ہیں۔